Inventarisashon trayektonan di siña i traha pa hóbennan na Kòrsou den kuadro di Programa di Akshon Desaroyo di Hubentut

WILLEMSTAD- Na Avila Beach Hotel riba djamars 14 di yüni a tuma lugá un seshon di eksperto bon bishitá riba e tópiko di trayekto di siña i traha pa hóbennan.  E seshon a ser organisá pa e Tigerteam Trabou  i Empresario den kuadro di e implementashon di e Programa di Akshon Desaroyo di Hubentut 2015-2020. Na Kòrsou tin diferente trayekto ku ta dirigí riba yuda ampliá posibilidat riba merkado laboral pa hóbennan sin trabou. Huntu ku varios instansia ku ta ehekutá e diferente trayektonan aki, entre otro fundashonnan finansiá pa gobièrnu, kompanianan privá i ministerionan di gobièrnu,  e Tigerteam Trabou iI Empresario  di Sekretariado Desaroyo di Hubentut a traha riba un inventarishon pa por analisá kon por optimalisá e tipo di trayektonan aki.

Trayektonan di siña i traha  ta ofresé enseñansa práktiko den kombinashon ku guiá sosial na hóbennan. E meta ta pa trein hóbennan den un materia pero tambe pa duna guia i stimulá konfiansa propio pa nan por sigui desaroyá. Ultimamente lokual ta importante ta ku ta logra resultadonan  duradero, no solamente ku hóbennan por sigui tal trayektonan pero mas importante ku nan ta bini na remarke pa haña i mantené un trabou. E chèns ku hóbennan ta logra eksito despues di un trayekto ta depende si e trayekto ta pas ku nan interes i nivel di kompetensia i naturalmente si berdaderamente tin perspektiva riba merkado laboral.

Pa logra ku tin mas ‘match’ eksitoso pa hóbennan mester tin un mihó bista di e oferta aktual di trayekto siña i traha; ken ta ofresé kua trayekto, den kua sektor ta ofresé sierto trayektonan i si nan ta dirigí riba sierto grupo di enfóke. E siguiente stap ta pa wak si esaki ta kuadra ku e demanda ku tin bou di hóbennan i pa wak unda tin mas nesesidat of si tin  varios trayekto similar.

Un grupo di kasi 40 representante di organisashonnan ku ta traha riba e tereno aki a bini huntu riba djamars mainta i a dialogá riba e nesesidat pa organisá trayektonan mihó. E grupo a demostrá interes pa traha huntu i pa analisá kalidat di nan oferta.  E representantenan ku tabata presente tambe a enfatisá ku tin kondishonnan básiko ku ainda falta, entre otro un maneho stipulá dor di gobièrnu i kontinuidat di supsidio ku ta nesesario pa un implementashon  struktural.

A base di e inventarisashon i e input di e diálogo, e Tigerteam Trabou i Empresario lo formulá un konseho ku lo ser entregá na Plataforma Nashonal Desaroyo di Hubentut i Konseho di Minister probablemente den  luna di yüli 2016. Den ougustus 2016 lo organisá un seshon di diálogo ku hóbennan ku a yega di partisipá of ta partisipando na un trayekto di siña traha. Nan eksperensha i input tambe lo ser inkluí den plannan pa futuro.

Pa mas informashon di e Programa di Akshon Desaroyo di Hubentut por bishitá www.desaroyodihubentut.cw òf por tuma kontakto ku Deva-Dee Siliee via di info@desaroyodihubentut.cw