HR Netwerk Curaçao ta partisipá na e vakatura relatá na investigashon di Programa di Akshon pa Desaroyo di Hubentut

WILLEMSTAD – Miembronan di e HR Netwerk Curaçao a ser informá djamars dia 12 di yüli último tokante di e desaroyonan den e Programa di Akshon pa Desaroyo di Hubentut. Esaki a tuma lugá riba invitashon di e Tigerteam Trabou i Empresario na Fòrti.  Durante e enkuentro a hasi un petishon na e profeshonalnan aki pa na nòmber di e merkado di empleo duna un aporte na e investigashon “Bista riba e merkado di trabou”.

Den e Programa di Akshon intregralmente i konhuntamente ta traha for di 5 area temátiko, ta trata di Enseñansa i Kuido, Salubridat i Bienestar, Trabou i Empresario, Bibienda i Ambiente di bida i Seguridat. Esnan presente a haña un splikashon ekstenso pa loke ta trata e resultadonan i desaroyonan for di komienso di e implementashon na sèptèmber 2015. E programa ta ofresé un kuadro sostenibel pa krese posibilidatnan di desaroyo pa mucha- i hóbennan na Kòrsou i a realisá un monitor di hubentut pa por realmente haña bista di desaroyo di nos hubentut. Regularmente Desaroyo di Hubentut ta organisá enkuentro i seshon di informashon ku diferente grupo di enfoke i riba e wèpsait por haña un mapa sosial di organisashonnan ku ta traha ku hubentut i e banko di konosementu ku ta kontené investigashonnan importante.

Trabou i Empresario
Despues di un update general a bai mas a fondo riba e kontenido di e aktividatnan di e tim Trabou i Empresario. E Durante e último lunanan aki a traha prinsipalmente riba investigashon i sinkronisashon pa asina duna un base pa ku futuro desishonnan polítiko i di maneho. Reportahenan ku lo aparesé riba término kòrtiku ta duna un bista di entre otro loke ta ser ofresé na trayektonan di edukashon kombiná ku práktika (siña i traha), trayektonan supsidiá ku tin relashon ku e posibilidatnan di empleo bou di hubentut, trayektonan ku ta  stimulá pa bira empresario i e konekshon di enseñansa riba ku e merkado di empleo.

Investigashon di Vakatura 2015
Pa sostené hóbennan na momentu di hasi un eskoho adekuá pa loke ta trata estudio i fishi, informashon verídiko i realístiko ta nesesario. Pero awor unda e posibilidatnan ta riba e merkado di empleo? Den e temporada kua pasa e tim di Trabou i Empresario pa medio di media sosial, Internèt, gobièrnu i agensianan di empleo a kompilá mas vakatura ku ta posibel. E intenshon ta pa haña un bista mas kla di e funshonnan ku ta tabata disponibel, den kua sektornan i kiko e eksigensianan mará na nan ta. E investigashon kuantitativo ta ser komplementá ku datonan kualitativo. Ku e agensianan di empleo i e Banko Nashonal di Vakatura a papia ampliamente tokante di e faktornan di éksito i fayo pa mèch hóbennan na un trabou ku ta pas ku nan.

Dia 12 di yüli 2016 a drenta e delaster fase di e investigashon ku un enkuentro, pa tur e miembronan di e HR Netwerk Curaçao. Finalmente ta nan ta e profeshonalnan ku tin ku bai disidí ken ta bini na remarke pa vakaturanan i bou di kua kondishonnan. A diskutí tokante di e faktornan di éksito, kondishonnan previo i tur e posibilidatnan. Tur e presentenan a ser informá tokante di e desaroyonan aktual i a kompartí eksperienshanan i hasi pregunta.

E aportenan balioso aki ta ser kompilá den un rapòrt di investigashon i lo bini bèk den e konklushonnan i rekomendashonnan ku lo ser presentá na e Plataforma Nashonal i Hunta di Minister.

Pas mas informashon por akudí na e página di Facebook ‘Desaroyo di Hubentut’ i e wèpsait: http://www.desaroyodihubentut.cw/ . Òf por tuma kontakto ku Gofrie van Lieshout, Lider di Proyekto Trabou i Empresario, gofrie.vanlieshout@desaroyodihubentut.cw

 

Inloggen

Wachtwoord kwijt? (Sluiten)