Ku maneho integral pa desaroyo di hubentut ta krea mas oportunidat pa hóbennan

WILLEMSTAD— Den un sala yen na Hilton, djabièrne pasá 4 di novèmber  a tuma lugá un konferensha interinsular riba maneho pa desaroyo di hubentut ku e tema: ku maneho integral, mas oportunidat pa hóbennan. E konferensha a ser organisá dor di gobièrnu di Kòrsou, ‘Samenwerkende Fondsen in het Caribisch deel van het Koninkrijk’ i Plataforma Nashonal pa Desaroyo di Hubentut. E meta di e konferensha tabata pa duna funkshonarionan di gobièrnu i profeshonalnan di tur seis isla den reino e oportunidat pa interkambiá konosementu i eksperensha riba desaroyonan relashoná ku maneho di hubentut.

Minister-President di Kòrsou, dr. Ben Whiteman a duna inisio na e konferensha i a kompartí kon importante ta pa hasi hóbennan resistente kontra di faktornan di rísiko i pa duna nan e guia nesesario pa por desaroyá den siglo 21. Despues partisipantenan por a mira via de video un spich inspirativo di La Reina Maxima. La Reina a enfatisá su embolbimentu i esun di Rei ku e tema di desaroyo di hubentut i en partikular ku prevenshon di dropouts, paso esei tin un efekto enorme riba e perspektiva di e hóben.  Prevení ku hóbennan ta kai for di e sistema eskolar ta un di metanan prinsipal di e programa Kansen voor Jongeren na kua 15 organisashon riba 5 isla ta partisipá na dje. Samenwerkende Fondsen a kuminsá 3 aña pasá ku e programma aki pasobra a konstatá ku tur isla tabata dil ku un porsentahe haltu di schooldropouts. E organisashonnan ku ta partisipá na e programa ya tin 3 aña ta interkambiá ku otro eksperensha di nan proyektonan ku ta purba di tene hóbennan na skol òf den trayektonan alternativo di siña-traha. Lider di programa Freek Mekking a para ketu mainta na e resultadonan di e programa i e nesesidat di kontinuashon di e proyektonan.

Na e momentu aki tambe tur isla ta den proseso of tin un plan di maneho nobo pa ku desaroyo di hubentut. E konferensha pa Desaroyo di Hubentut tabata pues un oportunidat na un momentu úniko pa interkambia i siña di e situashon aktual riba tur isla pero tambe di e eksitonan i e retonan. A sinta den un panel, Sra. Sacha Geerman di Directie Sociale Zaken di Aruba, Sra.Judeska Cijntje di Centrum Familie en Jeugd, di St.Maarten Sra. Nicole Maccow di Department of Youth i representante di reino pa islanan BES, sr. Gilbert Isabella. Durante e panel a bin dilanti e diferente terenonan konkreto kaminda e islanan por traha huntu riba dje. Den e programa di atardi a enfoká mas riba práktika. Diferente partisipante a bai di bishita serka organisashonnan ku ta traha ku hóbennan na Kòrsou i esnan ku a keda a hasi un simulashon pa eksperenshá un manera integral di traha. Na final di dia tur hende a bini huntu pa un reflekshon final di e temanan ku a trata durante dia bou di guia di Sr. Herman Tjeenk Willink, Minister van Staat di Hulanda.

Por wak bèk riba un dia intensivo kaminda hopi kontakto a keda hasí. Alabes e balor agregá di kolaborashon a keda resaltá. Mas aun a yega na akuerdonan konkreto pa kompartí konosementu di entre otro kreashon di un monitòr pa hubentut.

 

Lòg in

Wachtwoord kwijt? (Sera)