Programa di Akshon Desaroyo di Hubentut ta presentá nota konekshon enseñansa merkado laboral i trayekto siña-traha na gobièrnu

WILLEMSTAD — Despues ku a sera Kenniscentrum Beroepsonderwijs Bedrijfsleven na 2015, algun instrumento importante ku tabata kontribuí konkretamente na un mihó konekshon entre enseñansa i merkado laboral a kai afó. Konseho di Minister a duna enkargo na Programa di Akshon di Desaroyo di Hubentut pa duna rekomendashon relashoná ku follow up di e aktividat i intrumentonan aki. Ku e nota ‘Opleiding & Arbeid’ ku ta keda públika awor, e tim di Trabou i Empresario ta duna kontenido na esaki. E nota ta analisá strukturanan eksistente, deseonan aktual di tur stakeholders den vèlt di enseñanda i sektor privá i ta pone énfasis riba e oportunidatnan pa futuro. Tambe Programa di Akshon pa Desaroyo di Hubentut ta presentá un inventarisashon di trayektonan siña-traha eksistente na Kòrsou.

Vishon, maneho, tumamentu di desishon i kolaborashon ta e elementonan di mas importante ku aworakí ta nesesario pa berdaderamente sigui mehorá e konekshon entre enseñansa ku merkado laboral. No solamente e disponibilidat di e medionan i finansa ta forma un reto, pero mester yega na klaridat riba responsabilidat i outoridat. Tin hopi aktor den vèlt ku ta embolbí pero no tin klaridat ken ta trèk kiko òf ta doño di kua aspekto, ku tin komo konsekuensia ku hopi kos ta keda pará i no ta keda ehekutá.

Un di e rekomendashonnan di mas importante ku por saka for di e nota “Opleiding & Arbeid”, ta ku mester evaluá na un manera kritiko e konseptonan eksistente ku tabata eksitoso, manera KBB, adaptá esaki i usa e konosementu i ekspertisio kaminda esaki ta kuadrá i ta nesesario. Esei mester pasa for di diferente punto di salida, e.o ekonomia, enseñansai trabou, i stakeholders mester bini huntu pa desaroyá  maneho ku ta delineá meta, tarea i rekurso i ta determiná ken ta tuma e rienda pa hasi kiko.

Banda di e proposishonnan konkreto pa un posibel struktura kon pa atendé ku e problemátika di konekshon na Kòrsou, ta menshoná kòrtiku e status tambe di algun kontenido di algun tema relatá manera entre otro formashon básiko di VSBO, e asina yamá Werkend Leren i Beroepspraktijkvorming, investigashon i enseñansa profeshonal.

Trayekto siña-traha

Ta un echo ku drenta merkado laboral no ta fasil pa hopi hóben. Kòrsou tin di haber ku un porsentahe haltu di ‘schooldropouts’ i desempleo bou di hóbennan. Den e kuadro ei, trayektonan alternativo ta nesesario, kaminda enseñansa tradishonal ta un komponente menos importante pero preparashon di hóbennan a base di guia intensivo i en espesial formashon práktiko i segun kontenido di e funshon/fishi ta hunga un ròl prominente. E trayektonan aki ta konosí komo trayektonan di siña-traha. E Programa di Akshon Desaroyo di Hubentut a inventarisá trayektonan eksistente na e momentunan aki na Kòrsou, kiko ta e karakterístikanan di e trayektonan aki i pa kua grupo di enfoke nan ta destiná. Huntu ku e organisashonnan ku ta ofresé trayektonan di siña-traha a evaluá kon pa sòru pa lokual ta ofresé konektá mihó ku nesesdidatnan di e grupo di enfoke pa sòru pa un match optimal. Lo presentá e resultadonan aki na Ministerio di Desaroyo Sosial, Labor i Bienestar pa wak kon por inkorporá e sugerenshanan for di vèlt den e maneho di e Ministerio. E organisashonnan ku ta ofresé trayektonan di siña-traha i e Ministerio kier yega na un lokèt sentral kaminda hóbennan i personanan ku ta guia hóbennan por akudí ora enseñansa regular no ta un opshon mas i e kaminda pa yega na trabou ta difisil. Na e loket aki tur e trayektonan di siña-traha ta konosí, lo hasi un ‘intake’ profeshonal i e hóben ta ser referí na un trayekto ku ta kuadrá ku su nesesidatnan. E siguiente paso pa e Programa di Akshon Desaroyo di Hubentut ta pa pensa huntu ku gobièrnu kon pa yega na duna forma na e lokèt na un manera funshonal i efisiente. E siman aki lo presentá e nota konekshon enseñansa i merkado laboral i e inventarisashon trayekto siña-traha na e Plataforma Nashonal pa Desaroyo di Hubentut i Konseho di Minister.

Banko di konosementu

Por download e notanan aki tambe via di e banko di konosementu digital na www.desaroyodihubentut.cw. Tambe tin otro factsheet i reportahe di tópikonan relevante, e.o algun publikashon di KBB.

Pa mas informashon tuma kontakto via e-mail gofrie.vanlieshout@desaroyodihubentut.cw

 

 

 

Lòg in

Wachtwoord kwijt? (Sera)