Dikon abo komo hóben mester bishitá 100 aña Isla den nos bida

Skibi pa Maxwell Brigitha, miembro di Konseho di Hubentut 2017

100 aña di eksistensia di Refineria Isla. Un historia ku no por menospresiá. Un historia ku ta demostrá un impakto sosial i ekonómiko hopi remarkabel. Asina remarkabel ku ‘National Archaeological and Anthropological Memory Management Foundation – NAAM – na Kòrsou a organisá un eksposishon úniko: 100 aña isla den nos bida.En preparashon pa e hubileo, NAAM a lanta un ‘think tank’ ku diferente persona den komunidat pa kontribuí idea na e eksposishon. Durante e proseso ei,  NAAM a realisá ku hopi hende no sa e historia, kausa i efektonan di nos Refineria isla.

Komo hóben mi sa ku esei ta berdat. Lamentablemente no ta tur hende tin konosementu di nos historia, sigur no hóbennan. Komo miembro di Konseho di Hubentut, esei tabata un punto ku a fasiná nos. Kon nos por sòru ku nos hóbennan por sa mas di nos propio historia i kultura i por identifiká i sinti nos mes orguyoso di esei?

Pa kuminsa nos propio búskeda di informashon di nos historia, nos a disidí di bishitá e eksposishon di NAAM. Pa nos por a haña un bista mas kompletu di kiko e eksposishon aki su balor ta, nos a entrevistá 3 pilar di e eksposishon 100 aña isla den nos bida, kual ta Sr. Marlon Reina, Sr. Erwin Gibbes i Sra Lida Pandt.

Promé impreshon di e eksposishon: interesante i sumamente detayá! E ta dunabu un bista profundo  di e impaktonan ku nos refineria a trese. NAAM a hasi un bon trabou di hasi e eksposishon interaktivo. E eksposishon ta partí na 3, sigun un orden kronologiko: prome ku e refineria, un bista di kiko a pasa durante e añanan ku nos refineria tei i ultimo, posibel senarionan pa den futuro.

Na komienso di e entrevista, Sra. Lida Pandt mesora a remarká ku mester para ketu na e impakto di Refineria Isla riba tabatin riba nos industria, kultura i pueblo di Kòrsou. E proyekto 100 aña isla den nos bida ta un enrekisimentu históriko di nos historia masha importante mes.

Segun Sr. Marlon Reina e mishon ta pa krea un plataforma pa desaroya un debate i interkambio entre generashonan. Nan grupo di enfoke ta tur persona.  E balor agregá na pueblo di Kòrsou ta e informashon nesesario pa pensa krítiko riba e futuro di e refineria. E eksposishon ta duna hendenan, sigur hóbennan i informashon nesesario pa argumentá krítiko riba e desaroyo di nos Refineria Isla. Dor di komprondé nos pasado, nos por pensa pa futuro.

Mesora nos a puntra kiko ta e reakshon di hóbennan ku ta bishitá e eksposishon?

Marlon: “Tur e hóbennan ku a bishitá nos eksposishon a gusta masha tantu mes. Sigur pa dos motibu: nan ta realisá ku nan sa masha tiki mes di Refineria Isla i Kòrsou. Tambe hopi parti a hasi un impakto riba e hóbennan, komo ku e eksposishon ta digitalisá, kreativo, artístiko i interaktivo. Ora tin Hòbennan di bishita mi ta papia ku nan, nos ta dunanan pregunta manera: ki influensia Refineria Isla tin riba bo famia? Hopi hóben tin un tio of kualke miembro di famia ku a òf ta traha na Refineria Isla. Ta importante pa nan rekonsé ku e refineria no ta solamente un pilar ekonómiko, pero tambe un pilar di famia.  Tambe nos ta puntranan pregunta di nan ambishon, antes tabata komun ku hóben ke bira piloto of ke bai traha den Refineria Isla.
Pa e hóbennan di skol sekundario nos a traha un quiz. E quiz ta pa yudanan kompilá informashon mas mihó i siña di e historia di Refineria.”

Sra. Lida tambe a enfatisá esaki: “bo ta siña asina tantu kos ku bo no ta haña den e kuriíkulo di skol, e ta diveribel, e ta leuk huntu ku e quiz ku e hóbennan ta yen’é, e ta influensia nan kuriosidat i nan lo bini ku mas pregunta despues. Sr. Gibbes a reakshoná ku no ta berdat ku hóbennan no ta haña historia. E problema ta sinta ku nan tin ku skohe entre historia I un otro materia. Den mi opinion historia di nos isla mester ta un insignatura obligatorio na tur nivel den nos enseñansa.

NAAM mes ta desaroyá material edukativo i ta stimulá skolnan pa hasi uso di esaki. Marlon ta menshoná ku hóbennan ta haña un lès prome na skol pa nan prepara prome ku nan bin wak e eksposishon. E lès ta dirigi pa muchanan entre 10 pa 12 aña di edat,dùs muchanan di grupo 6 te ku 8. Tambe nos ta dedika un lès pa hobennan di klas 1 te ku 3 di skolnan sekundario. Adishonal, NAAM ta organisa charlanan pa pueblo kompletu ku ta duna profundiashon di un tema den e eksposishon.

Tabata interesante tende Sr. Reina papia riba e influensia riba famia. Refineria Isla tabata tin asina un gran impakto riba mi famia, komo ku mi tawela i 3 tio a traha einan. Tabata un privilegio di por a siña mas di nos refineria. Probablemente lo mi no ta eksistí si no ta pa e Refineria Isla. E impakto ku e refineria tabatin riba mi tata su infansia ta sumamente grandi. E parti ku mas a kaptivá mi tabata 30 di mei. Mi tawela semper a bisami ku 30 di mei tabata un fiesta pa alkoholikonan. Maske ku na skol sekundario mi a kompronde ku 30 di mei tabata tin un gran signifikansia pa e pueblo di korsou.

Konseho di Hubentut ta rekomendá tur hóben pa bai hasi un bishita na e eksposishon aki. NAAM a hinka hopi dedikashon pa trese un kompilashon di un parti krusial di nos historia na un manera maestral. Dor di kompronde nos historia, nos por sa di unda nos a bini i unda nos ta bai. Nos refineria no ta solamente un pilar ekonomiko, e ta un pilar sosial tambe. Nos refineria isla ta kontribuí na diiferente aktividatnan artisitiko i deportivo. Sin Refineria Isla problamente no lo tin e bario di Julliana dorp of Emmastad.  Korsou ta na un punto hopi krusial aworaki. Nos tin ku disidí ken ta bai sigi operá nos Refineria Isla i tur e pro i kontranan ku esaki ta trese. E desishon aki lo tin un efekto enorme pa ku desaroyo di e pais. Kòrsou lo mira un fluho di migrante pa trabou? Problamente nos mes lo haña stazje, empleo ets. serka e siguiente operadó. Òf…  nos lo bai biba riba un tera ku tabata tereno industrial? Pa tuma un desishon importante asinaki nos mester ta bon informa i NAAM a hasi un gran trabou den e direkshon ei. E eksposishon lo sigi opera te ku yüli 2017. Hasi bon uso di e posibilidat aki hóben!

“The key to the present is the past. The key to the future is the present.

 

Mas informashon

NAAM tin hopi idea grandi pa prolongá i ekspandé e eksposishon di 100 aña Isla den nos bida.
Algun planesnan ta pa trese e eksposishon mas serka dor di duna charla den barionan i asta hasi e ekposishon mas interaktivo i kreativo.
Pa mas informashon di NAAM i e eksposishon 100 aña Isla den nos bida, bishita e wèpsait di NAAM :  http://www.naam.cw/

Adres

Johan van Walbeeckplein 13

Tel: +5999 4621933/+5999 4621936

Info@naam.cw

Habrí pa públiko Djamars-Djabièrne 9-12 or parti mainta/ 2- 3:30 parti atardi

 

Inloggen

Wachtwoord kwijt? (Sluiten)