Eksitoso anochi di interkambio entre hóbennan i polítikonan

E promé anochi di interkambio estilo ‘catchbox’ entre mas o menos 50 hóben i diferente polítiko tabata un eksito total! Gran parti di e hóbennan presente a kompartí palabranan di elogio i gratitut pa e echo ku nan por a haña e oportunidat pa ekspresá nan mes i partisipá riba un base di igualdat den un seno ameno ku polítikonan. A trata 2 tema di relevansia pa ku desaroyo di hubentut i e interes pa kombersá i skucha otro tabata grandi. E anochi alabes tabata inisio di e trayekto Konseho di Hubentut, ku lo duna hóbennan oportunidat struktural pa ta embolbí den tomo di desishon ku ta trata desaroyo di hubentut na Kòrsou.

Plataforma Nashonal pa Desaroyo di Hubentut ta hopi kontentu ku mayoria partido, entre otro Pueblo Soberano, MAN, MFK, PAR, PAIS, DP, Un Kòrsou Hustu, Partido Nashonal, Pro Kòrsou i Kòrsou di Nos Tur a manda un representante. A skohé konsientemente pa pidi hóbennan i adulto sinta den sirkuló di forma ku por tene un kombersashon direkto ku otro. A trata e 2 temanan den grupo chikitu, di e forma ei dunando tur hende un chèns pa skucha i forma nan opinion i despues a habri e tanda pa hinter públiko kompartí ku otro. Esun ku tin e catchbox ta haña 1 minüt pa trese su opinion dilanti anto despues skohé un otro persona pa pasa e catchbox p’e. Si bo tin e catchbox bo por skohé tambe pa hasi un pregunta na un otro persona ku despues lo bo kier pa tin e ‘catchbox’. E interkambio tabata asina fenomenal ku a tuma muchu mas tempu i e preguntanan a sigui unu tras di otro. E resultado ta ku tur hende a sinti nan parti di e kombersashon: adulto, hóben, polítiko, ambtenar, miembronan di organisashonan ku ta traha ku hóben. E promé pregunta a trata e eksperensha di hóbennan pa ku oportunidat pa haña trabou i kon por krea mas oportunidat riba merkado laboral i e di dos pregunta a trata e ròl di hóbennan pa krea barionan mas seif i kon otro ‘stakeholder’ por yuda den esaki.

Segun Daniel Corsen Jr, Presidente di Plataforma Nashonal pa Desaroyo di Hubentut, e eksito di e anochi ta demostrá ku mester sigui fasilitá ku hóbennan ta haña chèns di gosa di un partisipashon formal. Esei ta presisamente e meta di e Konseho di Hubentut ku pa fin di aña lo ser instalá. E Konseho di Hubentut lo duna hóbennan un chèns pa indiká prioridatnan pa ku nan mes desaroyo i pa embolbí hóbennan den e proseso di implementashon di e Programa di Akshon pa Desaroyo di Hubentut 2015-2020. Lo elegí 9 hóben ku lo bai traha intensivamente pa 1 aña ku Plataforma Nashonal pa Desaroyo di Hubentut i e diferente Ministerionan ku ta forma parti di e plataforma.

Inloggen

Wachtwoord kwijt? (Sluiten)